О любви и мире между супругами Молитва мученикам Андриану и Наталии
О, священная двоице, святии мученицы Христовы, Адриане и Наталие, блаженнии супрузи и доблии страдальцы! Услышите нас, молящихся вам со слезами, и ниспослите на ны вся благопотребная душам и телесем нашим, и молите Христа Бога, да помилует нас и сотворит с нами по милости Своей, да не погибнем во гресех наших!
Ей, святии мученицы! Приимите глас моления нашего, и избавите ны молитвами вашими от глада, губительства, труса, потопа, огня, града, меча, нашествия иноплеменников и междоусобныя брани, от внезапныя смерти и от всех бед, печалей и болезней, да выну вашими молитвами и предстательством укрепляеми, прославим Господа Иисуса Христа, Емуже подобает всякая слава, честь и поклонение, со Безначальным Его Отцем и Пресвятым Духом, во веки веков. Аминь.
ТРОПАРЬ, ГЛАС 4
Мученицы Твои, Господи, Адриан и Наталия, во страданиих своих венцы прияша нетленныя от Тебе, Бога нашего: имеяй бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.
ИН ТРОПАРЬ, ГЛАС 3
Богатство неиждивущее вменил еси веру спасенную, треблаженне, оставль отеческое нечестие и Владыки стопами шествуя, Божественными даровании обогатился еси, Адриане славне; Христа Бога моли спастися душам нашим.
КОНДАК, ГЛАС 4
Жены Богомудрыя Божественная словеса в сердце положив, Адриане мучениче Христов, к мучениям усердно устремился еси, с супругою венец прием.
ИН КОНДАК, ГЛАС 4
Мученик возсия Божественная память, и земныя озари вся концы светло, с веселием зовущих: Ты еси мучеников, Христе, радование.